[2020藝術節節目冷知識] DAY 10 - 舞壇巨人貝嘉的不朽傳奇

[2020藝術節節目冷知識] DAY 10 - 舞壇巨人貝嘉的不朽傳奇

2019.12.31

【距離2020年尚餘1日~】以舞蹈歌頌愛與生命 舞壇巨人 #貝嘉 的不朽傳奇
-
大家記唔記得2019年香港藝術節嘅其中一位編舞大師約翰‧紐邁亞 (John Neumeier)? 佢帶來香港嘅其中一套作品《約翰‧紐邁亞的世界》入面,其中一隻男男雙人舞係《作品100 – 給莫里斯》,呢隻舞係約翰‧紐邁亞為佢嘅好友莫里斯而作,用黎慶祝佢70歲生日。

呢度可以睇番舞蹈片段:https://www.youtube.com/watch?v=ica__DQFMDw

原來個位「莫里斯」就係講緊2020年香港藝術節其中一套作品《#貝嘉如是說》嘅「莫里斯·貝嘉」。
-
莫里斯·貝嘉同約翰‧紐邁亞一樣係芭蕾舞編舞家,佢編舞手法融合咗表現主義、古典及現代芭蕾、劇場等元素,作品華麗且富視覺效果,喜歡以肢體語言、音樂及戲劇張力共同營造高度的感染力。佢嘅芭蕾舞作品可以話係開創咗「二十世紀芭蕾舞」嘅先河,最為人熟悉嘅著作包括《#春之祭》、《#波麗露》、《#火鳥》、《#第九交響曲》等。貝嘉於1960年創立二十世紀芭蕾舞團,後來因為瑞士洛桑能提供更佳條件和年度補助,二十世紀芭蕾舞團於是由布魯塞爾移居洛桑,並改名為 #洛桑貝嘉芭蕾舞團
-
然而,#成功男人嘅背後總有另一位男人 ,貝嘉最偏愛嘅一位舞者係喬治.唐(Jorge Donn),佢於十六歲加入二十世紀芭蕾舞團,由於佢俊美嘅外貌及優越嘅身體條件,貝嘉為佢編咗好多隻舞,包括《上帝的小丑-尼金斯基》、《愛的梵歌》、《春之祭》、《波麗露》、《我們的浮士德》等。而貝嘉本身亦係一位同性戀者,所以呢位阿根廷籍的舞者除左係貝嘉嘅愛徒,更係貝嘉嘅情人。1992年,喬治.唐死於愛滋病,貝嘉曾經深受打擊;其後貝嘉發表新作《#生命之舞》,其中一個創作動機就係為左追憶英年早逝的喬治.唐。
-
有藝評家曾經講過:「貝嘉的一生就是生命的生、死、愛情。」舞蹈除咗係肢體線條同力量美嘅展示之外,都係一種情感嘅宣洩。貝嘉嘅編舞唔算複雜,但舞者嘅肢體動作簡潔有力、步伐充滿力量。貝嘉熱愛用舞蹈表達佢對生命嘅感悟,甚至喺佢生命中嘅最後幾個月,都仍然堅持創作,最後因心臟病同腎衰竭而身亡。貝嘉遺留比後世嘅,唔只係革命性嘅舞蹈風格,而係佢對生命嗰份執著同熱情。
-
今年藝術節,舞團繼承人 #羅曼 承傳大師風格,創作咗《貝嘉如是說》,紀念貝嘉逝世十週年同洛桑貝嘉芭蕾舞團創團三十年。《貝嘉如是說》巧妙地結合電影、舞蹈同戲劇。透過錄像片段,貝嘉會「親自」闡述個人創作嘅理念,同羅曼隔空對話,當年嘅舞者同而家嘅舞團新進,將一同演繹一代舞蹈大師嘅作品。
-
洛桑貝嘉芭蕾舞團
《貝嘉如是說》節目介紹:https://www.yfs.artsfestival.org/yfs/free_events/view/368/…/