[2020藝術節節目冷知識] DAY 9 - 在紙上跳格子的文學作家 西西

[2020藝術節節目冷知識] DAY 9 - 在紙上跳格子的文學作家 西西

2019.12.30

【距離2020年尚餘2日~】在紙上跳格子的文學作家 #西西
-
香港文學作家西西呢個名,相信大家都唔會陌生,但「西西」呢個筆名嘅意思大家又知唔知呢?唔通佢中意去密西西比河?西西里島?...原來呢個筆名係源自於佢細個中意玩嘅遊戲 - 跳飛機。西西其實係象形文字,「西」係一個著裙嘅女仔兩隻腳企喺四方格入面,如果兩個西字放埋一齊,就會係兩格電影菲林,變成跳飛機嘅動畫。「西西」,就係一個女仔由一個格子跳去第二個格子嘅意思。對西西而言,寫作都係一個跳飛機、爬格子嘅遊戲,時而熱鬧,時而寂寞。
-
西西筆下的 #兩個女子
西西嘅筆名充滿童趣,佢嘅作品《蘋果》、《肥土鎮的故事》,都充滿幻想色彩。而《#像我這樣的一個女子》同《#感冒》係西西作品中比較少有嘅「愛情故事」,兩篇小説嘅主角都將對愛情嘅絕望歸咎於命運嘅安排。西西用第一人稱嘅獨白詮釋女性喺愛情路上嘅掙扎,同面對社會期望嘅無奈。佢筆下嘅兩個女子,一個係既渴望又畏懼愛情的殮容師;一個係喺溫室長大、卻希望掌握婚姻自由以至命運嘅女子。文中一再強調:我既然係「這樣的一個女子」,就只好接受命運。但歸根究底,都係社會嘅意識形態令兩個女子一再否定同限制自己。兩個女子一旦相遇,將會為佢地嘅人生帶來咩轉變呢?
-
今年藝術節,近年作品廣被世界各地樂團演奏嘅作曲家盧定彰,與藝發局文學藝術新秀獎得主黃怡攜手開闢香港文學同音樂新境界,將香港作家西西嘅經典短篇小說《像我這樣的一個女子》同《感冒》改編成室內歌劇《兩個女子》。盧定彰2018年於捷克首演嘅《像我這樣的一個女子》英語版廣獲好評;新作中更加嘗試以粵語入詞,描寫兩個女子意外相遇,對照彼此嘅愛情故事。資深導演甄詠蓓運用豐富的戲劇元素,以歌劇形式細說兩個女子嘅内心獨白。
-
#賽馬會本地菁英創作系列《後話西遊》/《兩個女子》
節目介紹:https://www.yfs.artsfestival.org/yfs/free_events/view/388/…/