[2020藝術節節目冷知識] DAY 3 - 笑中帶淚嘅即興劇場《伊朗式自白》

[2020藝術節節目冷知識] DAY 3 - 笑中帶淚嘅即興劇場《伊朗式自白》

2019.12.24

【距離2020年尚餘8日~】

笑中帶淚嘅即興劇場 #伊朗式自白
-
正所謂「台上一分鐘,台下十年功。」喺正式演出之前,每位演員都要經過無數次嘅練習同彩排。來自柏林嘅伊朗劇作家一納西姆.蘇拉曼波 (Nassim Soleimanpour),佢嘅戲劇作品《伊朗式自白》,竟然唔需要排練,演員仲要上到台先可以開封佢份劇本?
-
《伊朗式自白》係一個唔需要排練同導演嘅即興劇場,劇本至今已翻譯超過12種語言,喺世界各地演出超過300場,每次都係揾當地演員演出。觀衆將會同演員一齊衝破語言、地域、身分的界限,慢慢了解劇作家嘅自傳故事。喺語言不通嘅情況下,我地又可以點樣理解彼此?
-
你知道嗎?劇作家嘅名,Nassim,喺波斯語入面係「微風」咁解。劇作家嘅母語係波斯語,而居住喺柏林嘅佢又會用英文同德文創作、生活。語言,或者母語,對你嘅意義又係咩呢?睇《伊朗式自白》,或者會令你有另一番體會同感觸。延續咗蘇拉曼波前作《白兔‧紅兔》獨特嘅「#冷讀」戲劇形式,劇本會透過投影機出現喺觀衆同演員眼前。演員見步行步嘅忐忑,將會變成一個個幽默動人嘅時刻。
-
香港藝術節每晚會邀請本地著名演員演出,演出除咗有英語版之外,都有粵語版演出,以地道粵語細說伊朗式故事。