[2019藝術節節目冷知識] DAY 10 - 一步一舞台

[2019藝術節節目冷知識] DAY 10 - 一步一舞台

2018.12.24

距離聖誕節仲有1日!

歷史上好多藝術家都曾經被另一位藝術家嘅作品深深影響,呢種影響甚至會呈現於佢自己嘅作品入面。例如台灣編舞家 #林懷民,年輕時於一次現代舞蹈發表會認識左現代舞大師瑪莎·葛蘭姆Martha Graham,啟蒙左林懷民對於現代舞編舞理念的喜好。佢之後更加入讀 #瑪莎葛蘭姆舞蹈學校研習現代舞。學成後,林懷民希望為台灣人創立一個現代舞團,於是佢創立左「#雲門舞集」,將現代舞帶入台灣。所以雲門舞集除左做正式演出之外,仲會響台灣好多地方做社區表演,希望用現代舞感染台灣基層觀眾。

另一位編舞大師約翰‧紐邁亞John Neumeier主要受到兩位大師嘅影響。第一位係著名芭蕾舞蹈家 #尼金斯基 Vaslav #Nijinsky,佢有著非凡的舞蹈技巧,而且係當時少數識足尖舞嘅男性舞者,擁有驚人的跳躍力。#約翰紐邁亞 深受尼金斯基影響,並視佢為靈感泉源。佢曾經編製過幾隻關於尼金斯基嘅舞蹈,例如《華斯拉夫》、《尼金斯基》等,被公認為尼金斯基專家。

第二位對約翰‧紐邁亞影響深遠嘅大師係芭蕾舞編舞大師 #佩蒂巴Marius #Petipa,佢被指為芭蕾舞史上其中一位最有影響力同作品最豐富的編舞家。多套芭蕾舞經典作品都係出自佢手筆,例如《#胡桃夾子》、《#睡美人》、《#天鵝湖》等。

約翰‧紐邁亞今次帶黎香港嘅其中一套作品《胡桃夾子》入面就可以清楚見到大師佩蒂巴嘅影子。約翰‧紐邁亞新編嘅《胡桃夾子》並唔係沿用傳統嘅故事,而係講述一個女孩響12歲生日會上收到一位芭蕾舞大師送嘅芭蕾舞鞋,繼而對芭蕾舞產生興趣。夢中,芭蕾舞大師帶女孩進入芭蕾舞世界,教佢跳舞。約翰‧紐邁亞覺得佢自己就係個位小女孩,因為佢出生嘅地方好少機會俾佢接觸芭蕾舞呢門藝術;而佩蒂巴就係果位芭蕾舞大師,帶佢進入芭蕾舞世界。

睇到呢度,我地會發現一位大師並唔係無中生有,憑空出現,而係響佢成長歷程入面受到其他大師,或者其他人、事、物、成長經歷所影響,而造就今日嘅佢。今年藝術節主題「#一步一舞台」講嘅就係呢種概念。

節目介紹:
雲門舞集45週年 林懷民舞作精選:https://bit.ly/2SigYK5
漢堡芭蕾舞團–約翰.紐邁亞
《胡桃夾子》:https://bit.ly/2VaDZR5
《貝多芬計劃》:https://bit.ly/2EO39zU
《約翰.紐邁亞的世界》:https://bit.ly/2BFOlzl

#大師影響大師 #聖誕倒數