[藝術冷知識] 乜嘢係「假面舞劇」?

[藝術冷知識] 乜嘢係「假面舞劇」?

2018.08.27

唔知大家仲記唔記得之前我地喺呢度分享過關於莎劇《仲夏夜之夢》嘅冷知識呢?事不宜遲,等我地依家繼續探討呢個話題!

我哋喺上文提及過《仲夏夜之夢》係莎士比亞以雅典公爵同亞馬遜女王大婚作為背景,為英國達官貴人編寫嘅一場「婚禮劇」(Wedding Play)。點解莎士比亞要寫一齣以婚慶作主題嘅戲劇呢?原來喺十六、十七世紀嘅英國,皇室貴族間好流行一種叫「假面舞劇」(Masque)嘅表演藝術,呢種舞劇專門會喺婚禮等等嘅重要節慶上演出,有住好特別嘅象徵意義。

事源喺中世紀後期嘅勃艮第公國(Duchy of Burgundy,即現今法國中、東部等地區),貴族賓客為咗酬禮王子,會將聖經內容、神話寓言、道德辯論等等嘅題材結合成為一套宮廷劇(Courtly Show),親自演出畀王子欣賞。當時民間亦流行一種類似嘅露天歷史劇(Pageant),傳聞仲有一種習俗:戴住面具嘅參加者會隨機去一名貴族嘅府上拜訪,然後一年間有幾晚都會帶禮物上去載歌載舞。呢啲習俗隨住時代嘅更替,漸漸演變成後來大受歐洲皇室歡迎嘅「假面舞劇」,風靡全歐洲。舞劇演出嘅主題多數係關於出生、婚宴、皇室更迭或者帝王進國等等嘅喜慶禮節,以呼應當時場合,仲會綜合音樂、舞蹈、詩歌、故事等等嘅元素,配以盛大排場,最後以皆大歡喜嘅結局謝幕。呢種表演形式最有趣嘅地方,莫過於係在場賓客可以戴住面具參與演出──就算佢地唔知道劇情,都可以就當時場合嘅禮節自由發揮,即興加入表演創作。

莎翁嘅《仲夏夜之夢》劇內充滿假面舞劇嘅歌舞元素,其中喺尾聲仲上映一齣由織工波頓自編自演嘅假面舞劇──「劇中劇」《皮拉摩斯與提斯柏》,慶祝主角忒修斯公爵同希波呂忒女王嘅婚禮,妙趣橫生。

#仲夏夜之夢系列二 #假面舞劇 #劇中劇 #AMidsummerNightsDream #Masque #WeddingPlay