[藝術冷知識(七)]跳每支舞嘅幕後大功臣係...?

[藝術冷知識(七)]跳每支舞嘅幕後大功臣係...?

2017.08.11

跳每支舞嘅幕後大功臣係...?

今期嘅藝術冷知識以舞蹈作為主題,但係今日小編唔打算每種舞逐隻介紹,咁介紹啲咩好呢?喺舞台上我哋習慣咗將注意力放喺舞者身上,呢個好正常,但而家想大家留意吓嗰地面。原來舞者跳舞嘅地面會有一層俗稱「Marley」嘅舞蹈地膠(performance surface)。之所以叫「Marley」,係因為呢個優質舞蹈地膠既牌子名喺行內實在太出名啦,大家就直接將舞蹈地膠叫做「Marley」。優質嘅舞蹈地膠係用PVC整嘅,仲會根據唔同嘅舞蹈需要,造出唔同程度嘅磨擦力、彈性、滑度嚟達到減震嘅效果,咁樣舞者雙腳就可以少好多負擔,做出彈跳、旋轉、滑移呢啲動作。除此之外,地膠表面經過特殊處理之後,唔單止有吸音功能,而且仲會配合燈光嘅亮度,避免吸光或者反光,舞者對眼就無咁容易產生疲勞感(點解突然會有做sales既即視感^^”)呢塊地膠既然咁勁,自然價值不菲,原來要舖滿一個小型劇場既Marley,舞台上既成本就要萬萬聲咁計,好矜貴㗎!正因為咁出現喺舞台上既人都要好小心錫住呢片空地,譬如唔好俾重嘢長期壓住塊膠啦,唔好俾可能會刮花地膠既嘢出現。