[藝術冷知識(六)]《天鵝湖》女主角竟然唔係最搶鏡?

[藝術冷知識(六)]《天鵝湖》女主角竟然唔係最搶鏡?

2017.08.02

《天鵝湖》女主角竟然唔係最搶鏡?

唔知道大家有冇睇過由娜塔莉.波特曼(Natelie Portman)主演嘅電影《黑天鵝》?身為芭蕾舞者嘅女主角喺《天鵝湖》完美詮譯咗白天鵝同黑天鵝兩角。現實之中《天鵝湖》演出嘅時候,因為兩個角色嘅外貌理應一樣,所以同樣會由一人好似人格分裂咁去分演黑白天鵝兩角,但間唔中都會由兩個人嚟演。

值得注意嘅係,黑天鵝反而比白天鵝呢位女主角更受觀眾注目。原因係,喺《天鵝湖》第三幕黑天鵝嘅獨舞變奏中,芭蕾舞者要一口氣好似個陀螺咁做足32個被稱為「揮鞭轉」嘅單足立地旋轉 (fouette)。呢項絕技係由意大利芭蕾舞者皮瑞娜.萊格納尼 (Pierina Legnani)於1892年獨創,絕對係膾炙人口嘅重頭戲!成個過程裏面腳尖嘅移動範圍唔可以超過一條皮帶圍成嘅圈圈,先算係一流表演。呢項絕技對女演員嘅腿力要求非常之大,成為用嚟衡量芭蕾演員實力嘅試金石。據說曾經有舞者原本俾人選中成為女主角白天鵝,但為咗挑戰呢項絕技,放棄演出白天鵝而去演黑天鵝,可見黑天鵝呢個角色幾有魅力!

小編喺呢度做少少題外延伸~~同樣嚟自俄羅斯又係講天鵝公主嘅故事,除咗有《天鵝湖》之外,仲有《沙皇薩爾坦》。故事裏面唔單止公主會變天鵝,王子仲會變身成進擊嘅黃蜂添!有興趣嘅朋友就去睇吓,順便對比兩個故事有咩分別啦^^

參考網址:https://kknews.cc/zh-hk/entertainment/omrbae6.html