[藝術冷知識(五)] 綠袖子不等於公開試!

[藝術冷知識(五)] 綠袖子不等於公開試!

2017.07.31

綠袖子不等於公開試!

考過DSE或者舊制會考、AL嘅學生一聽到《綠袖子》就會聯想到公開試,甚至將佢哋劃上等號,原來呢首歌由1995年開始就已經喺每年嘅公開試度播。呢首柔和嘅歌曲,考評局話就話係用嚟俾考生放鬆心情,但揀首描寫愛情嘅歌放喺考試度唔會好奇怪咩?如果你覺得奇怪,咁真係小巫見大巫。事關早喺1728年,《綠袖子》曾經俾英國作曲家約翰.蓋伊(John Gay)編入《乞丐歌劇》(The Beggar’s Opera),而呢套劇唔但止含有濃厚嘅政治諷刺意味,而且令到當時大名鼎鼎嘅德國劇作家韓爾德(George Frideric Handel)放棄歌劇轉行寫神劇,所以呢次《綠袖子》出場嘅地方又係同風花雪月、愛恨情仇無咩關係,大家應該司空見慣╮( ̄▽ ̄")╭

我哋熟識嘅聖誕歌都係好似Jingle Bell呢啲比較歡樂嘅歌曲,唔講你可能唔知聖誕歌都可以遇見《綠袖子》。許冠傑1986年嘅《寂寞聖誕》就係改編自《綠袖子》,不過腔調就悲情咗啲,都算係同歌曲原意「悲傷」掛勾嘅。咁你可能會問,有冇首正正常常嘅《綠袖子》可以感受到男子思念愛人嘅深情版本啊?聽咗勁多首唔同版本嘅《綠袖子》、超有自虐傾向嘅小編就喺點播系列放咗兩首幾好聽嘅版本,有興趣可以去聽吓^^

提提大家,考評局用嘅版本係英國作曲家佛漢威廉斯(Vaughan Williams)所寫嘅《綠袖子幻想曲》(Fantasia on Greensleeves)。考慮到大家嘅心理陰影面積,就唔擺條link喺度嚟傷害弱小心靈嘅朋友仔啦^^

《綠袖子》點播系列~~
1.改編自《綠袖子》既許冠傑《寂寞聖誕》:https://www.youtube.com/watch?v=cQ9T5jyQuvM
2.六人男子無伴奏合唱小組The King's Singers現場演唱《綠袖子》:https://www.youtube.com/watch?v=twix9KfES9Y
3.The Brothers Four獻唱《綠袖子》:https://www.youtube.com/watch?v=JMBuTHR6huw

參考網址:
https://books.google.com.hk/books…