[藝術冷知識(四)]芭蕾舞剩係俾男人跳?

[藝術冷知識(四)]芭蕾舞剩係俾男人跳?

2017.07.20

藝術冷知識(四):芭蕾舞剩係俾男人跳?

唔知你知唔知道,芭蕾舞喺早期既時候其實只限男性參演,劇裏面嘅女角都係由男士反串。喺父權社會之下,男士霸佔咗成個芭蕾舞嘅世界,成為眾人眼中嘅巨星,尤其是法國呢個散發浪漫氣息嘅地方,就曾經培育咗好多著名男芭蕾舞家。例如Jean Balon(1676-1739)以輕盈而具彈性嘅跳躍聞名,後世甚至以「ballon」嚟形容舞者跳躍著地時嘅輕柔姿態。1781年,Gaetan Vestris同Auguste Vestris兩父子搭檔喺倫敦演出,捧佢哋場嘅觀眾多到迫爆議會街 (Parliament Street)部分路段,真係夠哂威水!

大約去到17世紀末,女芭蕾舞者先開始陸陸續續踏上專業嘅藝術舞台。嗰時女士們都要著嗰種又重又長到拖地嘅裙,令佢哋冇辦法跳出傳統古典嘅芭蕾舞步,只可以出演次要角色。大家而家之所以一諗起芭蕾就即刻聯想到女性形象,都係多得前人不斷改良芭蕾嘅配套,例如可以用足尖跳舞、穿著改良舞衣,令女芭蕾舞者嘅倩影喺觀眾嘅心度留下烙印。以前想跳芭蕾舞原來咁難,而家啲女仔真係要好好珍惜跳芭蕾舞嘅機會啦!

參考資料: 
http://mob.hkheadline.com/…/content_cl/2014/03/06/276836.asp
http://www.e-dancewear.com/Dance_Wear_Ballet_The_Male_Dance…