[藝術冷知識] 五大莎劇經典台詞

[藝術冷知識] 五大莎劇經典台詞

2020.03.20

【五大莎劇經典台詞】
-
To be or not to be 大家就聽得多,大家又知唔知呢句名言係出自莎士比亞劇作呢?莎士比亞係英國文學史上最傑出嘅戲劇家。佢寫下一句句發人深省嘅台詞,除咗令劇中人物形象栩栩如生之外,亦令佢嘅戲劇作品歷久不衰。時至今日,依然影響住無數嘅讀者同觀衆。今次小編就精選咗五句莎劇嘅經典台詞,就算無讀過drama都好,都可以從中得到啟發㗎!
-
“To be or not to be: that is the question.”
「生存還是毀滅,這是個值得思考的問題。」-《哈姆雷特
.
故事講述丹麥王子哈姆雷特嘅父親被殺害,時隔不到兩個月,母親就同叔叔結婚,繼承父親嘅王位。哈姆雷特透過父親嘅亡靈得知殺死父親嘅兇手係叔叔,於是佢就走上咗復仇嘅不歸路…“To be or not to be”係哈姆雷特嘅獨白,佢思考嘅問題係:究竟要默然承受命運,定係挺身反抗?
-
“What's in a name? A rose by any other name would smell as sweet.”
「名稱有甚麼關係呢?玫瑰不叫玫瑰,仍是一樣芳香。」-《羅密歐與茱麗葉》
.
呢句富有哲學意味嘅台詞,係來自茱麗葉對羅密歐嘅感嘆。故事講述兩位主角喺化妝舞會上一見鍾情,之後先發現大家原來係家族世仇…茱麗葉就認爲名同姓氏只不過係個稱呼,真正吸引人嘅係事物本身嘅特質:就算羅密歐改咗名,都係一樣咁善良同完美。
-
“Out, out, brief candle! Life’s but a walking shadow.”
「熄滅吧,熄滅吧,瞬間的燈火。人生只不過是行走著的影子。」-《馬克白》
.
人生有咩意義?對於馬克白嚟講,人生就好似影子咁,無法掌控自己嘅命運:等到燈火熄滅,就會消失得無影無蹤。馬克白對三位女巫嘅預言深信不疑 ─ 佢會成爲蘇格蘭嘅國王。為咗保住王位,馬克白不惜殺人。到最後,女巫竟然預言佢將會死亡…究竟馬克白嘅死係咪命運安排呢?
-
“The quality of mercy is not strained.”
「慈悲不是出於勉強。」-《威尼斯商人》
.
威尼斯商人安東尼奧,為咗幫助好朋友迎娶妻子,而同仇家 ─ 猶太人夏洛克借錢。最後,安東尼奧無法如期付款,夏洛克可以按照借據條款,割走佢身上嘅肉。而呢句經典台詞就係出自為安東尼奧辯護嘅律師口中:其實慈悲唔係出自勉強,而係好似解旱嘅雨水咁,造福每個人。對人仁慈,自己亦會得益。
-
“Love looks not with the eyes, but with the mind.”
「愛情不是用眼睛看,而是用心靈去感受。」-《仲夏夜之夢》
.
你信唔信有一見鍾情?《仲夏夜之夢》入面嘅四位主角就因爲精靈施下嘅魔法,而中意咗訓醒之後見到嘅第一個人。事情一發不可收拾,最後要精靈國王出面收拾殘局,先令有情人終成眷屬。莎士比亞就認爲真正嘅愛情,唔可以靠雙眼去判斷,就好似愛神丘彼特咁,經常被畫家畫成矇住雙眼嘅形象 ─ 只有用心,先可以感受到愛情。