[藝術冷知識] 五首貝多芬經典名曲

[藝術冷知識] 五首貝多芬經典名曲

2020.03.06

【五首貝多芬經典名曲】
-
上個星期我地就介紹咗歌劇嘅詠歎調,今日小編就為大家介紹下「古典音樂」~
-
一聽到「古典音樂」四個字,各位 Young Friends 可能會即刻想訓覺;又或者覺得「古典音樂」入場門檻太高,唔係我地呢d凡夫俗子聽嘅音樂... 大家千奇唔好比「古典音樂」四個字嚇親,要欣賞古典音樂,其實唔需要有豐富嘅樂理知識同了解音樂史,只需要你嘅一雙耳同耳機。每日抽少少時間欣賞古典音樂,可能仲會有意外驚喜添!適逢今年係貝多芬誕辰二百五十周年,我地今次就嚟欣賞吓貝多芬嘅經典作品啦~
-
1. 第五號交響曲《命運》

「從黑暗走向光明,通過鬥爭取得勝利」係全曲嘅中心思想。創作呢首樂曲嘅時候,三十幾歲嘅貝多芬飽受耳患困擾,但佢無向命運屈服,反而用音樂表現出強烈嘅情感同向命運挑戰嘅決心。音樂開首嘅「登登登凳!」,相信大家都唔會陌生。有人認爲呢段節奏係代表命運嘅敲門聲,亦有人話貝多芬嘅創作靈感係源自公園入面嘅鳥叫聲。無論真相係點都好,無可否認嘅係,《命運交響曲》係古典音樂入面最重要嘅作品之一!

Beethoven - Symphony No. 5 in C Minor op. 67: https://www.youtube.com/watch?v=olMPeiqoiic
-
2.《月光奏鳴曲》

「第一樂章的朦朧氣氛,有點像琉森湖夜晚的月色。」音樂評論家路德維希·萊爾斯塔勃,曾經以「琉森湖的月色」嚟形容貝多芬第14鋼琴奏鳴曲。自此之後,德國同英國嘅報刊都將奏鳴曲稱爲「月光奏鳴曲」,喺十九世紀後期,「月光奏鳴曲」呢個名已經係無人不曉。有人認爲貝多芬將呢首樂曲題獻比佢嘅學生 – 裘莉塔·圭齊亞蒂,係為咗表達愛意添!

Beethoven - Piano Sonata No 14 in C-sharp minor, Op 27, No 2: https://www.youtube.com/watch?v=ITidiBe-0T0
-
3. 第九號交響曲《合唱》

《歡樂頌》原文係德國詩人席勒嘅作品,貝多芬因為太喜歡呢首詩,就為佢譜上樂曲,並歷史上首次於交響曲加入了合唱同獨唱,為古典音樂開創新嘅一頁!貝多芬創作第九交響曲嘅時候,耳仔已經完成失聰,據說首演當晚,樂隊演奏完畢之後,台下觀衆深深被樂曲打動,掌聲雷動,歡呼經久不息。但由於貝多芬聽唔到樂隊嘅演奏,於是仍然繼續背著觀眾指揮,直至女低音扶佢轉過身來,佢先見到台下觀衆予以熱烈掌聲嘅場面!想知道呢首樂曲有幾振奮人心?咁就記得抽個半鐘嘅時間,靜心欣賞呢首傳達博愛、自由同和平嘅《第九交響曲》啦~

Copying Beethoven Movie Clip: https://www.youtube.com/watch?v=NlHuhiVw958
Beethoven - 9th Symphony: https://www.youtube.com/watch?v=rOjHhS5MtvA#t=52m13s
-
4.《給愛麗絲》

當然唔少得大家都耳熟能詳嘅《給愛麗絲》啦!無論有無學過鋼琴都好,你都一定會聽過呢首樂曲。意想不到嘅係,原來貝多芬一生都無公開過呢首作品,直至貝多芬逝世40年之後,先比一位德國音樂家發現,佢根據貝多芬當年嘅手稿,喺1810年完成呢首作品。據聞貝多芬係想喺宴會上用呢首樂曲向人求婚,但最後就因爲飲醉咗而無咗件事!

Beethoven - “Für Elise”:https://www.youtube.com/watch?v=s71I_EWJk7I
-
5. 《艾格蒙序曲》

歌名中提到嘅艾格蒙其實係真有其人!佢係一位獨立運動領袖,喺十六世紀嘅時候,帶領法蘭德爾(現時嘅荷蘭)人民對抗西班牙嘅暴政統治,但最後不幸被捕,被判下死刑。歌德將佢嘅故事改編成戲劇《艾格蒙》,而當時嘅劇院負責人就委託貝多芬為劇作編寫配樂。呢首情感澎湃嘅樂曲蘊涵住貝多芬對艾格蒙嘅崇高敬意,以及佢對「英雄」一詞嘅解讀:英雄要堅定不移地為理想奮鬥,就算要犧牲性命亦在所不惜。

Beethoven - “Egmont” Overture, Op. 84: https://www.youtube.com/watch?v=ChcrZX2rZ1M&t=90s