[藝術冷知識] 五首經典歌劇詠嘆調

[藝術冷知識] 五首經典歌劇詠嘆調

2020.02.28

【五首經典歌劇詠嘆調】
-
各位同學停課兩個幾月,一定好爽…ER唔係,一定努力咁上網自學喇!有見及此,小編決定為想開始接觸表演藝術,但又無從入手嘅同學仔介紹番唔同表演藝術界別經典嘅作品,等各位同學響停課期間多出黎嘅時間去嘗試接觸表演藝術!
-
今日我地先帶大家睇睇歌劇!詠嘆調係歌劇入面用作抒情嘅旋律,通常係獨唱曲,比劇中角色訴說內心感受,突顯人物形象。今次小編就精選咗五首經典嘅歌劇名曲,有興趣嘅就記得bookmark定,睇埋完整嘅歌劇啦!
-
1.《塞維利亞的理髮師》-「快給大忙人讓路 」

「人人都離不開我費加羅!」大忙人係邊個?原來係機智又幽默嘅理髮師—費加羅。除咗幫人剪頭髮之外,仲幫手撮合咗阿瑪維瓦伯爵同羅西娜小姐。呢段曲風輕快嘅詠嘆調,講述費加羅每日嘅工作有幾忙碌,仲講到城市入面人人都需要佢!呢首家傳戶曉嘅詠嘆調,喺動畫冰河世紀、Tom and Jerry入面都出現過㗎!

The Barber of Seville - “Largo al factotum”:
歌劇完整片段: https://youtu.be/SrPHHPdBQiY?t=1239
-
2.《魔笛》-「地獄之復仇沸騰在我心中」

「若薩拉斯特羅不是死在你手中,妳就不再是我的女兒!」《魔笛》係莫札特臨終前最後一部歌劇作品,呢段歌劇講述夜之后交左一把匕首比女兒帕米娜,要佢殺死太陽神殿嘅祭司。夜之后透過歌唱表達佢嘅復仇心切,呢首詠嘆調展現咗佢嘅霸道與狠毒,迂迴曲折嘅花腔女高音絕對令你一聽難忘!

Die Zauberflöte - “Der Hölle Rache kocht in meinem Herzen”:
歌劇選段: https://www.youtube.com/watch?v=YuBeBjqKSGQ
-
3.《茶花女》-「飲酒歌」

「今夜好時光請大家不要錯過,舉杯慶祝歡樂! 」歌劇講述了巴黎上流社會交際花微奧麗塔,為咗維護男方家族聲譽,決定犧牲自己嘅幸福,最終鬱鬱而終嘅悲慘遭遇。雖然係悲劇,但呢首詠嘆調就讚頌生命同愛情嘅美好同短暫,要大家活在當下,更展現咗歐洲上流社會晚宴嘅盛況同歌舞昇平嘅場面。

La traviata - “Brindisi”:
歌劇選段: https://www.youtube.com/watch?v=UZvgmpiQCcI
-
4.《卡門》-「愛情是一隻自由鳥」

「任誰都無法馴服愛情!」軍官荷西喺當值嘅時候,遇到喺香煙廠工作嘅吉普賽女郎卡門,被佢深深吸引,更為佢逃離軍營,加入走私行列。荷西十分癡情;卡門卻不願受拘束、移情別戀。最後死於荷西嘅匕首之下。「愛情是一隻自由鳥」正正展示咗卡門顛倒眾生嘅場面同佢豪爽直率、狂野奔放嘅形象。

Carmen - “L’amour est un oiseau rebelle”:
歌劇完整片段: https://youtu.be/8xa-oC71yqM?t=1326
-
5.《杜蘭朵》-「公主徹夜未眠」

「無人知曉我的姓名!」普契尼最後一部歌劇《杜蘭朵》嘅詠嘆調,係由男主角卡拉富王子演唱,故事講述中國公主杜蘭朵以猜謎招親,招親者須答中公主嘅三個謎語,答錯一題的話就要斬首示眾。而卡拉富答中曬三題,但杜蘭朵企圖悔約,卡拉富就話:如果公主可以講得出佢叫咩名,婚事就可以取消,佢亦情願被處死。於是公主就要全城徹夜幫佢查出王子嘅名,如果查唔到,全城百姓都必須受死。卡拉富就認為杜蘭朵咁做只會係徒勞無功...... 究竟呢位王子嘅下場會係點呢?

Turandot - “Nessun dorma”:
歌劇完整片段: https://youtu.be/4OYHQRGjjqw?t=7853