[藝術冷知識] 跳出瘟疫陰霾 — 慕尼黑桶匠舞

[藝術冷知識] 跳出瘟疫陰霾 — 慕尼黑桶匠舞

2020.02.24

【跳出瘟疫陰霾 — 慕尼黑桶匠舞】
-
喺1517年,席捲大半個歐洲嘅瘟疫 — 黑死病,降臨德國慕尼黑,奪去數千人嘅性命。人民被瘟疫嚇怕,唔敢出門。瘟疫過後,城市一片死寂。
-
當時,有位製造木桶嘅工匠想消除大家對瘟疫嘅恐懼,於是佢就係街頭起舞,鼓勵大家走出陰霾。意想不到嘅係,佢踏出嘅呢一步,令越嚟越多桶匠加入舞蹈,更令桶匠舞流傳到巴伐利亞其他地區,為人民帶嚟歡笑同重生嘅希望。
-
木桶成為咗桶匠嘅舞台,係巴伐利亞傳統音樂嘅伴奏下,桶匠揮動住經由樹葉裝飾嘅箍桶圈,隨著節奏變換隊形。而唔同隊形亦都有唔同意義,例如蛇形係代表帶嚟瘟疫嘅蛇;十字形象徵住希望同信仰;圓形係事情有好轉嘅意思。
-
時至今日,桶匠舞 (Schäfflertanz) 已經有五百年歷史。喺三十幾位表演者入面,只剩返七位係真正嘅桶匠。對慕尼黑嘅人民而言,桶匠舞唔只係一種舞蹈,更係一個溫馨提醒。提醒大家唔好忘記瘟疫帶來嘅災難,同維護傳統文化同道德嘅重要性。
-
不過,如果想親眼睇到桶匠舞表演,就要等到2026年1月啦!因為桶匠舞係喺自1760年起先成為傳統舞蹈表演,每隔七年表演一次,為期六週。至於點解係七年呢?有人認為係公爵威廉四世既決定,有人認為七係幸運數字。而最普遍既講法係,瘟疫每七年出現一次,桶匠舞表演可以警惕人民,避免瘟疫發生。
-
講到呢到,我地一齊回顧下2019嘅精彩片段先啦!
Schäfflertanz Rathaus 2019: https://www.youtube.com/watch?v=mCfViSFY-G4